ZAMBAL: Duka Liwawan....

ZAMBAL: Duka Liwawan....

Ite ha Zambales hitamo kano yay puron Zambaleno.
Ta yay halita kot ibat ha ngalan nin probinsya tamo.
Anungkot man no makuko itaw ha bali ni Papo ko.
Tagalog hilay aw-anak kaya bilang hiko yay dayo.

Anya'y nay nulyari ha babali nin saw-Zambali.
Angkot hila'y aw-anak kayna ampanalita Zambali.
Hinumiban tan in-abing anamaot ha sarilin babali.
Ya rin a tuturo kunla ya'y kababali tamon law-liti.

No angkabiyay ot hawanin ya'y paw-Papo tamo.
Ta malngo laka laloyma anay halita nin aw-apo.
Seguradon hila'y malulo tan makapootan kamo.
No anungkot nalingwanan ana'y halita Zambaleno.

Ambo duka no tanda tamo'y laluman haw-halita.
Ko't balo duka liwawan ya'y dati anan tanda.
No marumugan moy kababali kaganawan istorya.
Maski pa nako kan bungat manaliw nin buya.

Ya'y halita tamon Zambali ko't hayganan lung-on.
Lalo'y na no daw-dalaga ya'y pirmin angkatutulon.
No ankalngo nin laloma, ta ha babali hilay nitalon.
Bilang kanon manok-manok, kot labay-labay lan aligon.

Main assay anak nako yan nag-aral ha ibali.
Pahmurong na itaw ha sarilin nan babali.
Nalingwanan nay na kanon mag-Zambali.
Kaya halban nin nakalngo kuna ampakakali.

Yatti anamaot a maputi tan hay-gandan dalaga.
No mag-ingles ya hay-kaartiwan ta iba't Amerika.
Minghan nakikah yan nalyo itaw ha main hapa.
Nah-hipit yan alukapi, imbulyaw nay "anak-puha!"

Kaya hikamo halban a kawkaparan Zaw-Zambaleno.
No anyaman ya'y tuturo kuntamo nin maw-matuntawo.
Zambali kumon duka liwawan ituro ha aw-anak muyo.
Pigaw ya'y Zambali ko't kaya mahmot ha diksyonaryo.

Copy Paste/Like & Share
ProudtobeZambalenyo
ZambliNewAko
Kaway kaway kon lan naka intindi nin tula yati 😄😄
#BuwanNgWika2019
"Wikang Katutubo: Tungo sa Bansang Filipino"